ئالېكسېي كۇدرىن

    شىنخۇا تورى موسكۋا 26-سېنتەبىر تېلېگراممىسى: رۇسىيە زۇڭتۇڭ ئاخبارات ئىدارىسى 26-سېنتەبىر كەچتە ئاخبارات ئېلان قىلىپ ، زۇڭلىنى خەۋەرلەندۈرۈش قاتارلىق زۆرۈر تەرتىپلەردىن كېيىن، شۇ كۈنى رۇسىيە زۇڭتۇڭى مېدۋېدېۋ  بۇيرۇق ئىمزالاپ مۇئاۋىن زۇڭلى ، قوشۇمچە مالىيە مىنىستىرى ئالېكسېي كۇدرىننى ۋەزىپىسىدىن قالدۇردى، دېدى.

    كۇدرىن 25-سېنتەبىر ۋاشىنگتوندا دۇنيا پۇل مۇئامىلە فوندى تەشكىلاتى بىلەن دۇنيا بانكىسىنىڭ يىغىنىغا قاتنىشىۋاتقاندا ئاخبارات ۋاستىلىرىغا، ئۆزى بىلەن زۇڭتۇڭ مېدۋېدېۋ ئوتتۇرىسىدا ئىقتىساد ۋە مالىيە جەھەتتە بىر قاتار ئىختىلاپ مەۋجۈتلىقىنى، زۇڭتۇڭ سايلىمىدىن كېيىن مېدۋېدېۋ زۇڭلىلىق قىلىدىغان ھۆكۈمەتتە ۋەزىپە ئۆتەشنى خالىمايدىغانلىقىنى ئېيتقان.

    26-سېنتەبىر ئۇلىيانوۋسك ئىشتاتىدىكى دىمىتراۋگراد شەھىرىدە ئۆتكۈزۈلگەن رۇسىيە زامانىۋىلاشتۇرۇش ۋە ئىقتىسادىي تېخنىكا تەرەققىيات كومىتېتىنىڭ يىغىنىدا، مېدۋېدېۋ شۇ يىغىنغا قاتناشقان كۇدرىننىڭ جامائەت ئالدىدا ئېيتقان زۇڭتۇڭ بىلەن ئىختىلاپ مەۋجۈت، دېگەن سۆزىنى چۈشەندۈرىشىنى، بولمىسا ئىستىپا بېرىشىنى تەلەپ قىلغان. كۇدرىن شۇ ۋاقىتتا بۇ ئىشنى زۇڭلى پۇتىن بىلەن مەسلىھەتلىشىپ ئاندىن قارار چىقىرىدىغانلىقىنى بىلدۈرگەن.





 

مېدۋېدېۋ بىلەن كۇدرىن يىغىندا

    مېدۋېدېۋ يىغىن باشلانغاندا: زۇڭتۇڭنىڭ سىياسىتىغا گۇمانىي پوزىيتسىيەدە بولغانلارنىڭ ئوچۇق ئاشكارا ئىستىپا سوراش ھوقۇقى بار، لېكىن ئەمەلدارلار كەينىدىن مەسئۇلىيەتسىزلىك بىلەن «غەيۋەت» قىلىشقا يول قويۇلمايدۇ. كۇدرىننىڭ ئامېرىكىدا تۇرۇپ زۇڭتۇڭ بىلەن ئوتتۇرىمىزدا سىياسەت ئىختىلاپى مەۋجۈت دېيىشى ئەقىلگە مۇۋاپىق ئەمەس ھەمدە ھېچقانداق ئاساسى يوق. ئەگەر ئىختىلاپ مەۋجۈت بولمىسا، كۇدرىن بۇنى ئايدىڭلاشتۇرىۋېتىشى ، بولمىسا ئىستىپا بېرىشى كېرەك، دېگەن.

    مېدۋېدېۋ يەنە: كۇدرىن ئىستىپا بېرىش ھەققىدە ھەرقانداق ئادەم بىلەن مەسلىھەتلەشسە بولىدۇ، لېكىن مەن ھازىر زۇڭتۇڭ بولۇش سۈپىتىم بىلەن كېلەر يىلى مايدا ۋەزىپەم ئاخىرلاشقۇچە قارار چىقىرىش ھوقۇقۇم بار. رۇسىيەدىكى سايلام پائالىيەتلىرى باشلىنىپ كەتتى، بۇ بىر دۆلەتنىڭ تۈزۈلمىسى ۋە بەزى شەخسلەرگە نىسبەتەن بىر مۇرەككەپ سىناق. ھازىر تېخى يېڭى ھۆكۈمەت بارلىققا كەلگىنى يوق ياكى ئادەملەرنى ۋەزىپىگە تەيىنلەش توغرىسىدا ھېچقانداق تەكلىپ سۇنۇلمىدى دېمەك، ھازىرقى ھۆكۈمەت زۇڭتۇڭ ئالدىدا جاۋابكار بولىدۇ، ئاساسىي قانۇن رامكىسىدا  ئىش يۈرگۈزىدۇ، دېدى.





كۇدرىن 2000-يىلدىن باشلاپ ھازىرغىچە رۇسىيەنىڭ مالىيە مىنىستىرلىق ۋەزىپىسىنى ئۆتەپ كېلىۋاتقان بولۇپ، 2004-يىلدىن 2007-يىلغىچە ئۈزۈلۈپ قالغاننى ھېسابقا ئالمىغاندا يەنە شۇنىڭ بىلەن بىرگە رۇسىيەنىڭ مۇئاۋىن زۇڭلىلىق ۋەزىپىسىنى ئۆتەپ كەلگەن.

    ئىگىلىنىشچە، 27-سېنتەبىر رۇسىيە زۇڭلىسى پۇتىن بىرىنچى مۇئاۋىن زۇڭلى ئىگور شۇۋالوۋ بىلەن مالىيە مىنىستىرلىقىنىڭ بىر ئەمەلدارىنى كۇدرىننىڭ ۋەزىپىسىنى ۋاقىتلىق ئۆتەپ تۇرۇشقا تەيىنلىگەن